Yaponiyada ish va o’qish mavzusida seminar o’tkazildi

2025-yilning 12-mart kuni JICAning GROW loyihasi, O’zbekiston davlat jahon tillari universiteti talabalariga Yaponiyada ishlash va o’qish mavzusida seminar tashkil etildi. Yaponiyadagi bandlik imkoniyatlaridan foydalangan holda o‘zbekistonlik sanoat sohasidagi kadrlar salohiyatini rivojlantirish loyihasi (GROW) va O’zDJTU Sharq filologiyasi fakulteti Yapon tili nazariyasi va amaliyoti kafedrasi bilan hamkorlikda tashkil etilgan ushbu seminarda 100  nafardan ortiq talabalar ishtirok etishdi. Seminarda GROW loyihasi jamoasi, universitetdan vakillar shu bilan bir qatorda Yaponiyada ko’p yillik ish tajribasiga ega bo’lgan vatandoshlar va Migratsiya agentligi xodimlari ham ishtirok etishdi.

Kirish nutqlari

Dastlab O’zbekiston davlat jahon tillari universiteti Sharq filologiya fakulteti dekani DJURAYEV DILSHOD MAMADIYOROVICH universitetdagi yapon tilining o'qitilishi natijasida, talabalarning erishayotgan yutuqlari to'g'risida ma’lumot berib o’tdi. Jumladan o’tgan oyda yapon tili notiqlik ko’rik tanlovining Respublika bosqichida ushbu universitet talabasi faxrli 1- o’rinni egallab, O’rta Osiyo bosqichi uchun tayyorlanayotgani ta’kidlab o’tildi.

GROW loyihasi bosh maslahatchisi KURODA KIYOHIKO janoblari tomonidan kirish nutqida, loyiha maqsadi va hozirda amalga oshirilayotgan sa’y-harakatlar haqida ma’lumot berildi. Loyiha orqali O’zbekiston fuqarolariga yaratilishi ko’zda tutilgan imkoniyatlar, universitet talabalariga tushuntirib o’tildi.

 Seminarning asosiy qismi

Loyiha eksperti XASANOV JURABEK talabalarga Yaponiyada karyera qilish mavzusida taqdimot orqali tushuntirildi. Xususan, stajyor, maxsus malaka, yuqori malakali kadrlarni karyera yo’li, Yaponida muvaffaqiyat qozonish uchun muhim jihatlar haqida aytib o’tildi.

Seminarda talabalar uchun davra suhbati tashkil etildi. Bu davra suhbatida SAIDAHROR BURXONOV, SHOHRUH IBRAGIMOV va DOSTONBEK OLIMJONOVlar ishtirok etishdi. O’zlarining hozirgacha bo’lgan  tajribalari, bilim va malakani o’zlashtirish yo’llari qolaversa hozirda o’qish yoki ishni tanlashda ikkilanib turgan talablar uchun maslahatlar berib o’tildi. Kelajakda reja qilingan ishlarga, karyerani rivojlantirishga Yaponiyada imkoniyat yuqoriroq ekanligini, o’zlari misolida talabalarga va seminarga tashrif buyurganlarga foydali tarzda yetkazildi.
Seminarning so’ngi qismida, O’zbekiston Respublikasi Vazirlar Mahkamasi huzuridagi Migratsiya agentligi xodimi Mirzayev Akbarali so’zga chiqdi. Yapon kompaniyalari bilan jadal tarzda olib borilayotgan hamkorlik aloqalari haqida talabalarga tushuntirildi. Hozirda o’zbekistonliklarning Yaponiya davlatiga ishlash uchun keta oladigan sohalari haqida ma’lumotlar berib, ketish uchun e’tibor qaratiladigan jihatlari ham eslatib o’tildi.

 Xulosa va yakuniy fikrlar

Mazkur seminar Oʻzbekiston yoshlari, ayniqsa, yapon tilini oʻrganayotgan talabalarga Yaponiya mehnat bozori va ta’lim imkoniyatlari haqida muhim ma’lumotlarni taqdim etdi. Talabalar GROW loyihasi ekspertlaridan, Yaponiyada faoliyat yuritgan vatandoshlarimizdan va Migratsiya agentligi vakilidan bevosita maslahatlar olish imkoniga ega boʻldilar.

Davra suhbatlari, ekspert ma’ruzalari va talabalar bilan o‘zaro fikr almashish jarayonlari seminarni yanada qiziqarli va samarali qildi. Ayniqsa, Yaponiya bozorida mehnat qilish yoki o‘qish masalasida ikkilanayotgan yoshlar uchun aniq yo‘nalish va tavsiyalar berildi. Yaponiyada ta’lim va ish bilan bog‘liq imkoniyatlar kengligi, shu bilan birga, bunday jarayonlarga puxta tayyorgarlik ko‘rish zarurligi yana bir bor ta’kidlab o‘tildi.
Seminar davomida taqdim etilgan ma’lumotlar kelajakda Oʻzbekiston yoshlari uchun yangi yoʻnalishlarni ochib berishi, ularning xalqaro tajribaga ega boʻlishiga turtki bo‘lishi kutilmoqda. Shu munosabat bilan, GROW loyihasi va O'zbekiston davlat jahon tillari universiteti oʻrtasidagi hamkorlikning yanada rivojlanishi, talabalarga yangi imkoniyatlar yaratishda davom etishi muhim ahamiyat kasb etadi.
Tadbir barcha ishtirokchilar uchun foydali va ilhomlantiruvchi bo‘ldi. Yaponiyada ish yoki o‘qish imkoniyatlaridan foydalanish istagida bo‘lgan talabalarga bunday seminarlar yo‘l-yo‘riq ko‘rsatish va ularning muvaffaqiyatli kelajagiga asos yaratishda muhim rol o‘ynaydi.